全文：連結於留言區《追新聞》同《光傳媒》上周宣布合併，連日嚟唔少中外行家有報道，阿絲尤其欣賞幾篇評論，對2025年香港有深遠意義，值得大家反思。
當中《大公報》評論尤為出色，標題「反華網媒整合謀不軌 堅決懲治不容為禍香港」，配紅色小畫家風格交叉圖片，非常吸睛。文章指《國安法》後，反中媒體大洗牌，「化整為零」打游擊戰，近年政治風波背後有其煽風點火。
評論話合併有兩大圖謀：一係資源整合，二係整合輿論力量，「準備新對抗」。又指《追光者》眾籌400萬係「迷惑外界」，「淡化實力」、「掩飾財源」，仲話佢哋團隊已接近《立場》規模，根本「奇貨可居」唔可能無資源。
阿絲真係感動到喊出嚟！居然有人覺得我哋係「奇貨可居」，希望大家都信我哋嘅專業，我哋一定唔會令大家失望。
｜時間點成立係「司馬昭之心」？ 發動「軟對抗」？
評論又話，新平台目的唔係做新聞，而係「配合反華勢力」，進行意識形態宣傳戰，成立時機係「司馬昭之心」。而時間點係乜？評論指「香港正進入由治及興階段」，民情容易被挑動，炒作新聞會打擊信心。下半年有全運會、立法會換屆，呢個時候搞平台，就係「整合反中宣傳勢力」，發動新一輪「軟對抗」。
阿絲都想喊，《光傳媒》過去努力報道立法會，但讀者對立法會無興趣，亦有網民話唔想睇。我哋都唔知點進行所謂「意識形態」戰，希望評論作者不吝賜教，點先可令香港人重拾對政治新聞興趣？
｜具群眾基礎？煽動年輕人？對國家發動「立體攻擊」？
《追光者》除獲《大公報》青睞，《巴士的報》同《橙新聞》都點名關注。《巴士的報》話三大「黃媒」借新檔口「還魂」，指內部有《蘋果》《立場》前編採，甚至被通緝人士，咦？黑人問號。
又提練乙錚係顧問，仲串錯Steve Vines做Vince。《橙新聞》則話平台針對港府、針對國家，海外營運避開《國安法》，為未來「硬對抗」埋下伏筆。
評論更話「媒體組織具群眾基礎、可煽動年輕人、散播謠言，對國家及特區輿論攻擊」。阿絲表示：言重了，多謝賞識。仲提到海外媒體行動係「立體攻擊」，政府要警惕，維護國安同特區穩定。
阿絲孤陋寡聞，對「硬對抗」「立體攻擊」所知有限，日後還請多多指教，就此告退。
#追光者 #硬對抗 #光傳媒 #追新聞
加入YouTube頻道會員支持《追新聞》運作
Patreon｜
Instagram｜
Facebook｜
ko-fi｜